الشيخ بعجر وأم سحلول

بقلم: سامية أبو زيد

جريا على نسق البعكوكة، سوف نستلهم الشيخ بعجر وزوجته أم سحلول ولكن فى عصرنا الحديث .

الحلقة الأولى

أم سحلول : يا ندامتى، على ايه القيافة والعياقة اللى نزلت عليك دى يا عنيا؟
الشيخ بعجر: ما تصطبحى يا وليه ، عندى مشوار وطالع منه عالفضائية.
أم سحلول : ومالها الجبة والعمة ؟ راحوا فين يا راجل يا عديم المروة؟ قوام نسيت أصلك ولبست كاجوال وسبسبت حواجبك؟
الشيخ بعجر: بطلى نقار يا وليه وخلى عندك حبة مفهومية. الجبة والعمة مش بتوع الايام ديا. دلوقت الكلام بقى بالعاميه
عشان ادخل قلب الصبى والصبية. والعياقة والقيافة عدة الشغل ، والا فاكرانى هفية؟
أم سحلول : فشر.... ده انت نجم الفضائية والمحلية. بالسلامة يا ضى عنيا . وماتنساش تجيب معاك الملوخية.

الحلقة الثانية

الشيخ بعجر: مالك يا ام سحلول؟
ام سحلول: النبى ما انا عارفة مالى! طول الليل جنابى بتنقح عليا، وركبى بتزوم ومش شايلانى، والا دماغى، تقولشى هون فى سبوع!!! دق دق دق، لما خلاص ما بقيتش طايقة روحى.
الشيخ بعجر: خلاص أكلم الدكتور مكسوريان، يجي لك فى التو والحال.
أم سحلول: وعلى إيه؟ هى بس مصاريف، شوف لى رقية والا اعمل لى حجاب، مش طول النهار تعالج ده وده بالأدعية والأوراد؟ شوف لى ورد من بتوعك والا رقوة تشفينى. وانا برضه أولى مالغريب، والا هو باب النجار مخلع؟
الشيخ بعجر: يا ولية انت عاوزة لك كونسولتو، هو انت يحوق فيكى رقوة والا دعوة. وبعدين خدى هنا. مصاريف ايه اللى ناعية همها؟ انت حاتفضلى طول عمرك فقرية، ما بقينا عال العال والاشيا معدن والعيشة هنية.
أم سحلول: أنا عارفة انت مش عاوزنى اخف. عاوزنى اموت والا افضل عيانة عشان تتجوز عليا.
الشيخ بعجر: كلام ايه ده يا ولية يا خرفانة؟؟
أم سحلول: أيوة. هى دى الحقيقة . أنا عاجناك وخابزاك. مش حاتقدر تضحك عليا. فى إيدك الشفا وبخلان بيه عليا.
الشيخ بعجر: أنا ؟!! من امتى؟ وازاى؟؟
أم سحلول: يا سلام يا خويا . خش فعبى خش. وكتبك اللى مالية السوق عن السحر والجن والعين، كل ده كان ايه يا عنيا؟!!!
الشيخ بعجر: يا ولية ده كلام بنبيعه للناس ، نرجع احنا نشتريه؟!!! أما صحيح بطلوا ده واسمعوا ده!!
أم سحلول: طب والبرامج اللى بتطلع فيها؟ والناس اللى بيكلموك؟؟
الشيخ بعجر: كلام ابن عم حديد، بنهون بيه عالناس، واللى بيكلمونا دول عمال الاستوديو. أمال انتى فاكرة ايه؟
أم سحلول: ومالقيتش إلا الدكتور مكسوريان، ده دكتور تعبان. ده هو اللى أكبر عيان، ده لو جالى انا اللى حاقعد اعالج فيه، ومش بعيد ارقيه واغلى له حلبة حصى يمكن تشفيه.
الشيخ بعجر: هو انت مش عاجبك حاجة أبدا؟؟ لاااا، أنا أروح اشوف لى واحدة صبية، لا تقول لى ركبى ولا كلاويا.
أم سحلول: يا لهوتيييييييييييييييييييييييييييى . آخرتها عاوز تتجوز عليا؟!!
الشيخ بعجر: مثنى وثلاث ورباع، مش ده الشرع يا وليه، وانت ولية مرضانة وعلى طول عيانة. يبقى اجيب لنا صبية وحانخدمك أنا وهى.
أم سحلول: لا يا ننى عنيا. ادينى قمت أهو مالكش حجة، والا انت بتتلكك عشان تجيب لى ضرة؟
الشيخ بعجر: أيوه كده. صحيح، ناس تخاف ما تختشيش، فقتى ورقتى وبقيتى ولا الفرسة العفية. ما كان مالأول بدل وجع القلب والمناهدة فيا.

الحلقة الثالثة

الشيخ بعجر: سلامو عليكو، ازيك يا ام سحلول؟ وازى سحلول؟ هو فين مش شايفه؟
أم سحلول: فى الدرس يا نضرى، عنده حصة ... اللهم صل عالنبى .. ايوه عنده حصة انجيليش.
الشيخ بعجر: بدرى كده؟! تلاقيه مالحقش يتغدا.
أم سحلول: ولا صدع الزاد يا كبدى، يا دوب حط شنطته وتنه نازل عالدرس طوالى. أنا عارفة كان لازمتها ايه المدارس الأجنبية؟ لا وانت تضحك عليا وتقول لى مدرسة اسلامية. طب تيجى ازاى!! حايفظوه القرآن بلغات أجنبية!!
الشيخ بعجر: ايش فهمك انت يا ولية، دى مدرسة الإدارة بتاعتها أمريكية. يعنى أحسنها تعليم فيكى يا جمهورية مصر العربية.
أم سحلول: يا نهار اسود ومنيل؟ انت بتقول ادارة أمريكية؟
الشيخ بعجر: ايوه أمريكية مالهم الأمريكان؟ اجدع ناس.
أم سحلول: مش دول اللى كنت بتهاجمهم فى اسمها ايه الفضائية؟ وكنت بتقول الجهاد الجهاد؟! بأمارة ما اتكلمت على المدارس الإسلامية فى اسمها ايه دى بتاعة الشغالين؟؟ ايوه الفليبين. أوعى تنكر انا سامعاك بودانى اللى حايكلها الدود، وانت بتتخانق ومحموق عشان كانوا عاوزين يقفلوا المدارس الإسلامية فى باكستان و اندونيسيا ومانيزيا.
الشيخ بعجر: المانيزيا دى تاخديها لما يبقى عندك إمساك، اسمها ماليززززيا.
أم سحلول: ماليزيا والا مانيزيا، دى حاجة توجع البطن. رايح تدخل لى الواد عند الناس اللى ماتخافش ربنا دى وتضحك عليا بقولة اسلامية، مش انت اللى كنت بتقول دول عاوزين يلعبوا فى كتاب الله. طب وكتاب الله ما هو مكمل فيها. مالها المدارس الأزهرية؟ والا خلاص بقيت موضة من بعد ما عملت لى فيها هادى الفنانات؟
الشيخ بعجر: انت حاتفتقى لى؟ والا بتردحى لى؟ ده جزاتى انى عاوز الواد يتعلم أحسن علام؟
أم سحلول: بلا نيلة على دا علام، الواد يا كبدى اتمقت مالدروس الخصوصية، لا بياكل ولا حتى بيلحق ينام وتقول لى علام؟!! برريه من ده علام.
الشيخ بعجر: مالكيش انت دعوة، حايكمل فى المدرسة بتاعته يعنى حايكمل فيها لحد ما ياخد الشهادة مالجامعة الأمريكية، ومنها على أمريكا عدل يشتغل هناك وياخد الجنسية.
أم سحلول: يا لهوتيييييييييييييييييييى، عاوز تغرب الواد؟ عاوز تحرمنى من ضنايا؟
الشيخ بعجر: إحنا فين والسفر فين؟ ده لسه فى كى جى تو، ويبقى وقت الله يعين الله، واكون عملت لنا قرشين يعيشونا هناك مستورين.
أم سحلول: والنبى !! يعنى حاركب طيارة ؟ واتفرج عالدنيا من فوق؟
الشيخ بعجر: وحياة سحلول لا اوريكى اللى عمرك ما شفتيه ولا حلمتى بيه.
أم سحلول: بعجورتى لى طلب كمان .
الشيخ بعجر: عينيا يا ام الغالى.
أم سحلول: النبى على قلبك ما تقول لا ولا تكسفنى ولا تستخسر المصاريف وتقول لى نوفر.
الشيخ بعجر: هاتى مالآخر عاوزة ايه.
أم سحلول: باقول يعنى . أدام يعنى حانبقى راكبين طيارة، بالمرة نخطف رجلنا لحد الحجاز نعمل عمرة فى السكة واحنا طالعين على أمريكا.

الحلقة الرابعة
 

الشيخ بعجر: مالك يا ولية؟
أم سحلول: طب قول سلام عليكم الأول!! مش صابح كده حمرى جمرى!!
الشيخ بعجر: اعمل ايه، اذا كنت اول ما اصطبحت لقيتك لابسة لى الاسود وكل عين طماطماية؟! هو كان جرى ايه فى الدنيا لكل ده؟؟؟
أم سحلول: بقى كل اللى بيجرى حواليك وما انتاش دريان؟ ده انا منين ما اقلب الاقيهم يا بيتكلموا عن اعدام صدام يا عن العيال اللى يا نضرى شنقوا روحهم قال بيقلدوا صدام.
الشيخ بعجر: يا خبر اسود !!! اوعى حد يسمعك والا يشوفك بالمنظر ده !! انت عاوزة تجيبى لنا مصيبة؟!!
أم سحلول: مصيبة ايه وليه كفى الله الشر؟ مش مسلم زينا، واسمه برضه ريس عربى!! يعنى كرامته من كرامتناََ!!!!
الشيخ بعجر: انت عاوزة الناس يقولوا انك مع صدام؟! عاوزاه يتحسب على موقف سياسى؟؟؟ انت عارفة انا ماشى جنب الحيط . افتى يا بعجر
حاضر
اسكت يا بعجر
حاااااااااااااااااااااااااااضر.
والا عاوزة تجيبى لى مصيبة والسلام؟!
أم سحلول: ولا مصيبة ولا حاجة. طب ايه قولك بقى ان فى ناس بتقول عليه شهيد، بالحق هو كده يتحسب شهيد؟؟؟
الشيخ بعجر: وانا ايش عرفنى!!
أم سحلول: آه يانى، نفسى حد يرسينى.
الشيخ بعجر: على ايه؟
أم سحلول: هو مات شهيد والا لأ؟؟ يعنى لو سألوك فى الفضائية اياها والا فى الحرة حاتقول اييييييييييه؟؟ شهيد والا مش شهيد؟
الشيخ بعجر: والله حسب مين فيهم اللى حايدفع اكتر.
ساعتها ابقى ارسى معاك اذا كان شهيد والا مش شهيد.