الإضراب هو تعبير جماعي أو فردي للتعبير عن واقع الظلم والمطالبة بحقوق لم يتم الحصول عليها.. وهذه الظاهرة أخذت بالانتشار في الشارع المصري بشكل مثير للجدل ..ننتهي من نقابة المحامين لنجد عمال المحلة ومن ثم السيرك القومي . وهذا يعتبر فتح ملفات كثيرة لا نحبذ الخوض في تفاصيلها.

فنجد تجميد القضاء حين أضرب المحامون ..ووقف عجلة الإنتاج حين أضرب عمال النسيج في المحلة .

فماذا يحدث لو أضربت راقصات مصر ؟ ما هو الشيء الذي سيقف؟ وماذا يحدث لو اجتمعوا واعتصموا أمام مدخل شارع الهرم؟ وما هي الشعارات التي سيرددنها في اعتصامهن؟ سنجدهن يرددن

( مش راح نفتح للزباين طول ما الظلم في البار باين )

(مش راح نرعش ولا حنهز .. يلا ساوونا باحمد عز )

(مش راح نرقص في البارات الا بنقطة من الدولارات )

:.سيحدث ما لا يحمد عقباه من ازدياد عدد العاطلين عن العمل بين الإخوه البلطجية

:.خفض موارد الدخل للدولة بانخفاض حجم ضرائب السياحة

خسائر متوالية لشركات البيرة واتجاهها لإنتاج بيرة للأطفال

طبعا المحللون سيجدون مادة غنية لتحليلها عبر ’’الفضاحيات‘‘ المنتشرة عبر الأثير

وذلك بخلاف صفحات الجرائد والمانشتات الكبيرة والمثيرة

( ضربة في وسط السياحة المصرية)

(شارع الهرم مهدد بالإغلاق )

( إنخفاض مفاجئ في أسعار الترتر يؤدي إلى ارتعاش السوق المالي على واحدة ونص )

البلطجية يعتصمون أمام أبواب المسؤولين ويقولون ما مصيرنا بعد ذلك؟

(دكاترة التجميل يعتصمون أمام نقابة الأطباء لعدم وجود جلدة يشدوها )

وذلك بخلاف تصريحات المسؤلين

الوزير الفلاني :. راقصات مصر تراث قومي ويجب المحافظة عليه

رئيس المجلس الأعلى للآثار :.. وسط فيفي عبده لا يقل أهمية عن تمثال رمسيس ولابد من احتضانه

الدكتور فلان محلل اقتصادي :. إضراب الراقصات سبب رئيسي لانخفاض احتياطي الدولة من العملة الصعبة من دولارات واسترليني

وتبدأ ’’الفضاحيات‘‘ في بث برامجها

الجزيرة : من وراء إضراب راقصات مصر ...هل هي القاعدة ..أم قاعدة أكبر شوية؟

من المستفيدون من هذا الإضراب :.

هل اليد الصهيونية امتدت إلى وسط شارع الهرم؟

هل يوجد منظمات إرهابية وراء هذا الإضراب

انتظرونا في برنامج ’’وجه لضهر‘‘

المحور برنامج 65 دقيقة

معتز : النهاردا احنا معانا الفنانة السابقة سنية سوست وحا نتكلم في موضوع كبير قوي ..

الآن هو حديث الشارع المصري

معتز : ست سوست ايه رأيك في موضوع الإضراب وهل ممكن يكون له تأثير في المجتمع المصري ككل

وايه هيه طلبات الرقاصات

سوست : لولولولولولولولولي يا أستاذ معتز الرقاصات دول مش عضو عامل في المجتمع

معتز ::هو عامل بعقل؟! ده عامل مصايب ..ده كل يوم بيعمل

سوست::. الناس دي مش ليها حقوق برضوا؟!

معتز ::. زي ايه يا ست سوست؟

سوست :. يعني لو واحدة شفايفها دلدلت من كتر بوس الزباين مين حيشدهم لها؟

أو واحدة وهي بتفتح للزباين طارت الفله وجت في مناخيرها أو عينها ..مين اللي حيعالجها

ومتقولّيش صاحب الصالة... آه، دي الواحدة منهم يا عيني ما بتجبش آخر السهرة غير يادوب تمن البناجو

معتز :: يعني هما بيطالبوا بغطاء تأميني ِ

سوست : غطاء ..غطاء ايه؟! فال الله ولا فالك ده لو فيه غطاء ما نعرفش نشتغل لولولولولولولولي

وحين تنزل ’’الفضاحيات‘‘ إلى الشوارع لعمل تقارير عن الإضراب ..

مقابلة قناة ’’مؤ مؤ‘‘ الفضائية

المذيع :: حضرتك مشاركة في الإضراب؛ ايه هيه مطالبكم

الرقاصة :: عايزين حقوقنا يا استاذ ..الدخل ما بيكفيش ..يدوب سجارتين الحشيش والبانجو ..نعمل ايه قول لي؟ ننحرف عشان نعرف نعيش؟!!!

المذيع :: لأ طبعا كله ولا الانحراف

قناة العربية :

المذيع : في ظل الانحلال الإقتصادي والفساد السياسي في بعض المجتمعات العربية نجد صرخة جديدة تقف في وجه هذه الظلم وهو إضراب راقصات مصر ومعانا ال مش معروف هو ايه

نتعرف عليك

: أنا صبي أبلتي نبوية شيل إيدك

المذيع : أستاذ ’’صبي أبلتك نبوية شيل إيدك‘‘ انت عامل إضراب معاهم ليه؟

صبي نبوية : الله تبعاً اعمل ادراب .... مش أبلتي معاهم!!!

المذيع : طيب ممكن تشيل اللبانة وتقول لي عندك فكرة عن مطالبهم؟

صبي نبوية : لألألألألأ شيل ايدك يا استاذ عيب كدا ...بس حاقول لك

ده اللي بيحصل ظلم .أبلتي مثلا بتفضل تهز وسطها من الساعة 10 للصبح ده مش محتاج راحة

يعني لو جالها ديسك أو انزلاق غضرفي مين حيأكلني؟ هيء هيء هيء

يعني المصيبة واقعة علينا واقعة وكل ده بسبب موجة الإضرابات الجديدة .. وفشلنا في تطبيق أي فكر جديد

أذكر من خلال قراءاتي أنه حين تم وضع الفكر الشيوعي قامت الدولة حين ذاك بتدريب الشعب لمدة تجاوزت الخمسين عاما قبل تطبيق الفكر الشيوعي .بغض النظر عن نجاحه من فشله ..نحن في زمن التنفيذ العشوائي والفهم الخاطئ للفكر السياسي أو أي فكر آخر ..وليس معنى رفضي شيئا ما هو الإضراب، لوجود قنوات أخرى للحوار.