شبكة القلادة العربية - أخبار

سوق النخاسة

26-07-2009

الشهر دا جاى كمية مشاكل من بنات و أولاد على وش جواز و جوازاتهم بتتفشكل بسبب عادات و تقاليد قبلية لم يتحرر منها مجتمعنا حتى الآن.

المشهد الأول
العريس: أنا يشرفنى يا عمى انى أطلب ايد سوسو للجواز
أبو سوسو: طبعا يا ابنى ... سوسو متربيا على الغالى و اتصرف عليها كتير. عندك شقة؟
العريس: أيوة
أبو سوسو: هتكتبها باسم سوسو طبعا
العريس (و هو بيشر عرق): طبعا يا عمى
أبو سوسو: أنت طبعا عارف ان بنات عمها جاتلهم شبكة بكذا و اتدفع لهم مهر بكذا و اتكتب لهم مؤخر بشئ و شويات
العريس بيهز راسه من غير كلام
أبو سوسو: ليا طلب اخير
العريس: حضرتك تأمر يا عمى
أبو سوسو: اكتب لى وصل أمانة ب 5 مليون جنيه و طبعا دا لن يستخدم الا فى حالة حدوث أى ضرر لسوسو!

المشهد التانى:
العريس: أنا يشرفنى يا عمى انى أطلب ايد سوسو للجواز
أبو سوسو: طبعا يا ابنى ... بس انت تعرف سوسو منين؟
العريس: احنا زمايل فى الجامعة
أبو سوسو: هو انت لسة طالب؟
العريس: ايوة بس انا باشتغل من وانا عندى 16 سنة و كونت نفسى بنفسى و دفعت مقدم الشقة و ناوى ادفع مقدم العربية قريب و ...
أبو سوسو: هو انت أهلك مش ناويين يساعدوك؟
العريس: لأ .. بس انا راجل و باشتغل و بادرس و معتمد على نفسى و ....
أبو سوسو: لأ يابنى ما عندناش بنات للجواز!

المشهد الثالث:
سوسو و صاحبها أخيرا اتخطبوا بعد سنتين مصاحبة و راح يزوهم فى البيت
أبو سوسو: أنا ما يعجبنيش الحال المايل يابنى
خطيب سوسو: خير يا عمى حصل ايه؟
أبو سوسو: دخول و خروج و نزول و صور على الفيسبوك بتاعكو دا .... دى قلة أدب!
خطيب سوسو: دى كلها خروجات وسط أصحابنا و زمايلنا و أنا عندى اخوات بنات يا عمى .. مايصحش كدة
أبو سوسو: اسمع بقى يابنى .. اللى اوله شرط اخره نور .... مافيش خروج ... عايز تعرفها تعرفها هنا وسطنا! و ما فيش ركوب عربيتك ... تنزلها فى الشارع و هى تاخد تاكسى ... و مافيش تليفونات بعد الساعة عشرة ... و
خطيب سوسو (فى سره) أنا غلطان انى خطبتها ... ما كنت مصاحبها و داخل خارج معها

المشهد الرابع:
أم سوسو: سوسو متعلمة فى مدارس انترناشونال و خريجة جامعة خاصة و شغالة فى شركة مالتيناشونال ... و كل يوم و التانى جايلها عريس بس تقولى ايه بقى ... ابنك هو اللى عجبها
أم العريس (لوت بوزها): ابنى مش قليل يا أم سوسو .. ايه الكلام دا؟
أم سوسو: لألأ العفو .. انا مش قصدى ... المهم هنعمل ايه علشان نفرح الولاد؟
أم العريس: احنا جيبنا له الشقة و ان شاء الله نعمل له احسن حاجة
أم سوسو: و ناويين على ايه؟
أم العريس: شبكة و مهر 50 الف جنيه
أم سوسو: ايه دا و دول يجيبوا ايه .. احنا عايزين خاتم بفص بـ 30 الف و الفرش النص بالنص
أم العريس: كتير يا ام سوسو
أم سوسو: هى سوسو شويا ... دى اتقدملها سفراء و دكاترة
أم العريس (على مضد): ربنا يقدرنا
أم سوسو: و قايمة ب 500 الف جنيه
أم العريس (بحدة): احنا ما عندناش حد بيكتب قايمة
أم سوسو: و احنا ما عندناش حد بيتجوز من غير قايمة .. مش عفشها دا؟
أم العريس: هو ابنى جاى من الشارع؟ هيعمل ايه بالعفش يعنى؟
أم سوسو: و المؤخر 80 ألف
أم العريس: و شهر العسل و الفرح النص بالنص .. احنا ناس نعرف فى الاصول

أم العريس وافقت مرغمة و سوسو بعتت تسألنى ليه حماتها مش طايقاها و مش بتتصل تسأل عليها ... يا ترى ليه؟

كلمة أخيرة: اذا جاءكم عريس متريش و بقايمة زوجوه!

الكاتب : مروة رخــا

التعليقات

Dina	2009-08-01 02:42:19
والله ياريتها تيجي علي الشقة والشبكة ,, بس للاسف الموضوع مش كده خالص اناشايفة انه الاخلاق والتربية و الحب اهم شئ حتي لو مكنش ده اللي هيرضي الاهل

marwan ala ashaal	2009-07-27 13:52:35
bravo ya Marwa excellent scenarios which i have personally went through, very true

mohamed	2009-07-27 13:58:14
المغالاه فى المهو احد اسباب العنوسه وانا لى تجربه فى هذا

Emad Philip	2009-07-27 13:59:31
sorry about that but this is the truth

ayman

2009-07-29 13:35:51

للأسف هو ده السبب الرئيسي في ضياع شبابنا وشاباتنا الأهالي بيغالوا في كل حاجة ويقولوا بنحافظ على بنتنا ما يعرفوش ان الشاب اللي دخل البيت من بابه - زي ما بيقولوا - مايتعوضش اليومين دول نظرا لعدد البنات الهائل اللي يفوق عدد الشباب الهائج فالشاب الذي يقدم على هذه الخطوة في هذا الزمن هو شخص محترم ويريد العفة بالأصول

محمد السيد

2009-07-27 15:00:58

متريش و قايمة أيه يا مروة من غير مرسيدس سودة سبق أستعمالها من على الأقل سفير و مرة واحدة فقط مفيش جواز هى بنات الناس لعبة دة بدل ما يعزم رئيس وزراء أسرائيل زى ما السفارة المصرية عزمتة فى عيد الثورة هى الأسرة أقل من البلد و لا أيه... محمد السيد عضو حزب الوفد بالأسكندرية

2009-07-27 15:28:46

الكلام دة مش منطقي على فكرة و مبالغ فيه زيادة عن اللزوم و بالعكس انا شايفة ان الاهل ف الوقت الحالى بيتساهلوا جدااا يعنى حرام نعمم الكلام ده و نقول ان هوه دا اللى بيحصل اكييد لاء في كده و في كده و في الاول و في الاخر المشكلة في الظروغ الاقتصادية مش في الاهل بس

samah	2009-07-27 16:12:56
excellent job ya koko. I really like the scenarios very much

احمد رجب	2009-07-27 16:22:11
ياجمده يامروه ..بس نسيوا حاجه يامروه "شوفتي فيلم جواز بقرار جمهوري"مين بقي هيعزم رئيس الجمهوريه في الفرح هههههههه..

gege	2009-07-28 00:15:44
ده لو كل الناس هتعمل زى الناس دى مكنش حد اتجوز وحرام برضه اثنين بيحبوا بعض يخسروا بعض علشان حاجات زى دى وربنا معانا كلنا .

khokhaa	2009-07-28 03:29:50
To7fa ya marwa,i like it so much,its really true,but i wanna to say (low ahl el 3arosa tasamo7o fi 7agat keeter,2emet el 3arosa 3nd el 3arees bet2l keteer,also)

NG	2009-07-28 18:53:58
w yareeet de bas el 7agat ele bt7sal da fe anyal w anyal w ma 5afya kan a3zam bas da bardo maymna3sh en f nas lesa feha dma3'

badr

2009-07-28 19:42:20

انا شايف ان الشاب الى زى كدة وظروفة صعبة ومش لاقى شغل فى بلدة يسافر برة فى اى دولة عربية او اجنبية ويتجوز من هناك لان دايما الغرب بيكون احسن من الى منك فى كل حاجة العمل والزواج ومن الاخر بتحس انك وسط اهلك الى بيعرفوا امتك وبيقدروك كويس وبالنسبة لبنات بلدك خليهم يفصلوا العريس بمعرفتهم بس يارب يكفى كل البنات وخصوصا ان نسبة البنات اكتر من نسبة الرجال بكتير جدامع تمنايتى بالتوفيق ليهم (وزواج عرفى اكتر) ومحدش يزعل من كلامى

سالى

2009-07-29 15:02:50

صح اوووى دة بجد الى بيحصل بالظبط الاهالى فاكرين ان بكدة بيحافظوا على حقوق بنتهم مش عارفين ان العروسة بالشبكة بالشقة بتبقى فى الاخر عن العريس لو عاز يعمل بيهم اى حاجة مش هتقلة حاجة وبالعكس من كتر الطلبات بيكون العريس زهق من العروسة والجواز كلة حتى لو كان بيحبها

ارسال تعليق


الرئيسية ๏ الأخبار ๏ الأحداث ๏ الاتصال بنا