البيت بيتك برنامج بقاله اكتر من ثلاث سنوات ، وفي الحقيقة كان من ضمن اقوى برامج التوك شو اللي قدرت تكسر الحاجز بين التلفزيون والمشاهد المصري ،برنامج كان مختلف عن باقي البرامج بيعرض قضايا انسانية واجتماعية وسياسية وكلها هزت الراي العام .. لكن دوام الحال من المحال لان ستائر هذا البيت حتسدل اواخر فبراير ، الموضوع دا خلى الناس بين مؤيد ومعارض وناس مش فاهمة حاجة ، وبين القيل والقال وبين حيتغير اسمه فقط  وبين ان البرنامج كله حينتهى ..زوايا مختلفة علشان هو جروب مختلف قررنا عرض الموضوع بشكل نقاط علشان ننهى الازمة ..

                ملحوظة: الموضوع من مصدر موثوق فيه..

قدمت الادارة العامة للشؤن القانونية اللي موجودة في رئاسة اتحاد الاذاعة والتليفزيون مذكرة بتوضح فيها خطورة الموقف من استمرار البرنامج على وضعه الحالى واللي ممكن يعرض الاتحاد لمخاطر تؤدي الى حصول ايهاب طلعت تعويض مادي ،وعلشان يحافظوا على البرنامج وخاصة انه ناجح عرضت الادارة العامة للشؤن القانونية حل  وهو انهم يحجزوا على مستحقات "محمود بركة" اللي بتساوى 24 مليون جنيه ..محمود بركة هو شريك في البرنامج، واسناد مهمة تمويل وانتاج البرنامج لوكالة صوت القاهرة للاعلان كونها صاحبة حق الاعلان الحصري على شاشة التليفزيون ، وكان الحل دا مخرج لاتحاد الاذاعة والتليفزيون من دوامة التعويضات المالية وفعلا وفقا لمستندات جت الوكالة وحلت مكان الشركة المنتجة القديمة " بركة ديزاين "  في شهر اكتوبر اللي فات .

   المرحلة التانية كانت متقسمة لاتجاهين :

      الاول: التصالح مع رجل الاعمال ايهاب طلعت وقبول العرض المقدم منه بتسديد مديوناته للقطاع الاقتصادى مقابل التنازل عن البرنامج . والاتجاه دا اترفض   للموقف الغامض تجاه ديون ايهاب للقطاع الاقتصادى للاتحاد ورفض محاولات السابقة منه لتسديد ديونه.

        الاتجاه التانى:استمرار نفس محتوى ومكونات البرنامج مع تغيير الاسم علشان يبقى دا المخرج القانونى لاستبعاد ايهاب طلعت وبركة.

 والاتجاه دا اتوافق عليه من قيادات ماسبيرو لكن وكالة صوت القاهرة رفضت لان تغير الاسم حيعرض العملية التسويقية لمخاطرلكنهم طلبوا مهلة لدراسة الوضع مع العملاء..

لكن الكلمة الاخيرة كانت للمهندس اسامة الشيخ رئيس اتحاد الاذاعة والتليفزيون اللي وضح فيها ان الاتحاد مش طرف في اي خلاف يخص البيت بيتك  وانه في نهاية شهر فبراير ستنتهى علاقة اتحاد الاذاعة والتليفزيون ببرنامج التوك شو "البيت بيتك "وسيكون هناك برنامج اخر بديل لم يتم بعد الاستقرار على اسمه وانهم بالفعل في المراحل الاخيرة للشكل الجديد للبرنامج الذي سيطل علينا بداية مارس2010 وانهم فعلا اتعاقدوا مع الاعلامى  محمود سعد  وهما حاليا في مرحلة تفاوض مع باقي فريق العمل تامر امين وخيري رمضان وانه برنامج جديد يكون ملكية خاصة لاتحاد الاذاعة والتليفزيون..

     وبكدة يستعد البيت بيتك لاغلاق ابوابه ونوافذه ورحيله عنا..